దేశంలో తలసేమియా కేసులు పెరుగుతున్న నేపథ్యంలో ఈ వ్యాధిపై అవగాహన పెంచాల్సిన అవసరం ఉందని వైద్య నిపుణులు చెబుతున్నారు. ముఖ్యంగా పెళ్లికి ముందు తలసేమియా స్క్రీనింగ్ చేయించుకోవడం ఎంతో అవసరమని నిపుణులు సూచిస్తున్నారు.
ఇంటర్నెట్ డెస్క్ మే 9 ( మహాప్రభ ) : తలసేమియా గురించి చాలా మందికి పూర్తిగా తెలియకపోవచ్చు. కానీ ఇది చిన్న సమస్య కాదు. ఇది పిల్లల నుంచి పెద్దల వరకు ఎవరినైనా ప్రభావితం చేసే వంశపారంపర్య రక్తవ్యాధి. అందుకే పెళ్లికి ముందు అబ్బాయి, అమ్మాయి ఇద్దరూ తలసేమియా పరీక్ష చేయించుకోవాలని వైద్య నిపుణులు సూచిస్తున్నారు.
పెరుగుతున్న తలసేమియా కేసులు
ఇటీవల దేశంలో తలసేమియా కేసులు పెరుగుతున్నాయని ఆరోగ్య నిపుణులు చెబుతున్నారు. ఈ వ్యాధిలో శరీరం సరిపడా హిమోగ్లోబిన్ను తయారు చేయలేకపోతుంది. హిమోగ్లోబిన్ తగ్గిపోతే శరీరానికి అవసరమైన ఆక్సిజన్ సరైన స్థాయిలో అందదు. దీంతో అనేక ఆరోగ్య సమస్యలు తలెత్తుతాయి.
పెళ్లికి ముందే రక్తపరీక్ష
ఈ వ్యాధి తల్లిదండ్రుల నుంచి పిల్లలకు సంక్రమిస్తుంది. ముఖ్యంగా తల్లిదండ్రులిద్దరికీ తలసేమియా లక్షణం ఉంటే, పుట్టే బిడ్డకు తలసేమియా వచ్చే ప్రమాదం ఎక్కువగా ఉంటుంది. అందుకే పెళ్లికి ముందు రక్తపరీక్ష చేయించుకోవడం చాలా ముఖ్యం అని వైద్యులు చెబుతున్నారు.
తలసేమియా లక్షణాలు
తలసేమియా ఉన్న పిల్లల్లో చిన్న వయస్సు నుంచే కొన్ని లక్షణాలు కనిపించవచ్చు.
- తరచూ రక్తహీనత
- బలహీనంగా ఉండటం
- త్వరగా అలసిపోవడం
- ఎత్తు, బరువు పెరగకపోవడం
- చర్మం పాలిపోయినట్లు కనిపించడం
- శ్వాస తీసుకోవడంలో ఇబ్బంది
కొంతమందిలో ముఖ ఎముకల ఆకారంలో కూడా మార్పులు రావచ్చు. తీవ్రమైన తలసేమియా ఉన్నవారికి తరచూ రక్త మార్పిడి అవసరం అవుతుంది. చికిత్స ఆలస్యం అయితే గుండె, కాలేయం వంటి ముఖ్య అవయవాలపై ప్రభావం పడే ప్రమాదం ఉంది.
తీసుకోవాల్సిన జాగ్రత్తలు
కొన్ని సందర్భాల్లో ఎముక మజ్జ మార్పిడి ద్వారా తలసేమియాకు శాశ్వత ఉపశమనం లభించవచ్చు. అయితే చాలా మందికి నిరంతర చికిత్స, వైద్యుల పర్యవేక్షణ అవసరం అవుతుంది.
ఈ వ్యాధిని నియంత్రించడానికి సమతుల్య ఆహారం తీసుకోవాలి. తరచూ బ్లడ్ టెస్ట్, వైద్య పరీక్షలు సమయానికి చేయించుకోవాలి. పెళ్లికి ముందు తలసేమియా స్క్రీనింగ్ తప్పనిసరిగా చేయించుకోవాలి. తలసేమియా గురించి ముందుగానే అవగాహన కలిగి ఉండటం ద్వారా భవిష్యత్తులో వచ్చే ఆరోగ్య సమస్యలను చాలా వరకు నివారించవచ్చు.